على باب السفاره-علي سلامه

Reduced: 60% of original size [ 841 x 2191 ] - Click to view full image

على باب سفارة كندا...

لمحت ابليس و ف ايده

استمارة

بقوله على فين...

قاللى بص...

ياهجرة يا اعارة

ياعم زهقت كفرت...

ألاقيش معاك سيجارة...

أنا انتهيت خلاص

لانافع وسواس ولاخناس...

ولاليا عيش وسط الناس

دى عالم مجرمين..

عندكوا فائض ف الفساد

فى كل البلاد...

ومش محتاجين شياطين...

ملش عيش ف البلد دى

بقالى سنين عاطل....

وانتوا بتعرفوا

تقلبوا الحق باطل....

و تسلكوا القاتل....

وتمشوا ف جنازة

المقتول..

ومفيش مشاكل..

ياعم ده انا بقيت اوسوس

بالمقلوب..

واقول للحرامى كفاية بقى

توب..

انت هاتعمل كل الذنوب

لوحدك..

وانا ابليس..

اشتغل واعظ !!

ولا كمسارى ف
اتوبيس

ياعم ده انا زمان....

كنت استنى حد ينسى

يسمى

وهو بياكل لقمته...

دلوقتى كل اكلكم ملوث

وبصراحة الواحد خايف على صحته

ده مفيش ضمير اساسا....

علشان اموته

وكل واحد بمزاجه...

خربانه ذمته...

ياعم ده كل حاجة اتسرقت..

وكده الاجيال الجديدة

م الحرامية اتظلمت!!

ياراجل ده من كتر مالطشت معايا..

خرجت فى مظاهرة..

مع الناس اللى بتقول كفاية !!

وبرضه مفيش فايدة...